गौरादह नगरपालिका १ ले १० औं संविधान दिवसको अवसरमा वडाभित्रका ४० विपन्न परिवारलाई निःशुल्क स्वास्थ्य बीमा कार्यक्रम सुरु गरेको छ ।
कार्यक्रमअन्तर्गत नियमित औषधि सेवन गर्ने क्यान्सर, मृगौला, मुटुजस्ता दीर्घ रोगका १५ परिवारको बीमा नवीकरण र २५ विपन्न परिवारको नयाँ बीमा गरिएको वडा कार्यालयले जनाएको छ ।
वडा अध्यक्ष नगेन्द्र भण्डारीले यो पहलले वडाभित्रको स्वास्थ्य सुरक्षामा ठुलो राहत पुर्याउने विश्वास व्यक्त गरे । संविधानले सुनिश्चित गरेको स्वास्थ्यको अधिकारलाई व्यवहारमा उतार्न यो सानो तर महत्वपूर्ण कदम भएको उनले बताए ।
आर्थिक अवस्था कमजोर भएका नागरिकलाई उपचारका क्रममा आर्थिक बोझ नपरोस् भन्ने हाम्रो उद्देश्य हो´ भण्डारीले भने ।
वडाअध्यक्ष भण्डारीका अनुसार आगामी दिनमा पनि वडाले विपन्न परिवारलाई लक्षित गर्दै स्वास्थ्य सेवा पहुँचयोग्य बनाउन यस्ता कार्यक्रम निरन्तर चलाउने योजना रहेको छ ।
