काठमाडौं– किर्ते तमसुक बनाएर २ सय ९९ परिवारलाई ठगी गरेका सर्लाहीका श्याम परदेशी अहिले पुर्पक्षका लागि थुनामा छन् । तर, श्याम परदेशी थुनामा भए पनि उनका मान्छेहरुले गाउँलेहरुलाई बारम्बार फोन गरेर थर्काइरहेका छन् ।
शुक्रबारको नयाँ पत्रिका दैनिकमा स्थलगत रिपोर्टिङ गरेका किरण दाहालले लेखेअनुसार परदेशीले उच्च अदालतमा पुनरावदेन गरेको र उनी त्यहाँबाट फर्किए आफ्नो दुःख पनि फर्किने भन्दै गाउँले त्रसित भएका हुन् ।
लालबन्दीकी फत्मा खातुनको भनाइलाई दाहालले उद्धृत गरेका छन्, ‘दुलोमा पसेको सर्प निस्कियो भने के हुन्छ ?’
यसअघि प्रहरीले श्याम परदेशलाई १५ भदौमा पक्राउ गरेको थियो । उनले नक्कली तमसुक बनाएर ठगी गरेको भन्दै त्यहाँका एक सय पचास जना गाउँलेहरु न्याय खोज्दै काठमाडौं आएका थिए । काठमाडौंमा उनीहरुको पीडालाई मिडियाले व्यापक कभरेज गरेका थिए । यही कारणले उनलाई प्रहरीले पक्रन बाध्य भएको थियो ।
त्यति बेला एउटै मान्छेको नाममा एउटै मान्छेको नाममा ऋण दिइएको कानुनी कागज गर्न नमिल्ने भएकाले परदेशीले आफ्ना परिवारका सदस्यका नाममा ऋणीहरूलाई सातवटासम्म कागज गराएको गाउँलेहरुले बताएका थिए ।
प्रहरीले श्यामलाई मलंगवा नगरपालिकास्थित उनको घरबाट नै पक्राउ गरेको थियो ।
