लमजुङको बेशिसहरमा काँग्रेसको दुई पक्षबीच कुटाकुट भएको छ । सभापति शेरबहादुर देउवा र वरिष्ठ नेता शेखर कोइराला पक्षबीच भएको झडपमा चार जना घाइते भएका छन् ।
नेपाल तरुण दल लमजुङको पाँचौं जिल्ला अधिवेशनमा दुई पक्षबीच हानाहान भएको छ । गण्डकी प्रदेश सरकारका आर्थिक मामिलामन्त्री डा. टकराज गुरुङ, नेपाल तरुण दल केन्द्रीय अध्यक्ष विद्वान गुरुङ, केन्द्रीय सदस्य वृषराज गुरुङको उपस्थितिमा भएको अधिवेशनमा झडप भएको हो ।
अधिवेशनमा मनोनयन दर्ताको क्रममा टकराज गुरुङको पक्षका उमेदवारले एकलौटी रुपमा मनोनयन दर्ता गरेको आरोप प्रदेशका वन तथा वातावरणमन्त्री भेषबहादुर पौडेलका उमेदवार पक्षले आरोप लगाएपछि झडप भएको बताइन्छ । प्रहरीका अनुसार सुन्दरबजार ७ का ३७ वर्षे शंकर सापकोटाको टाउको र घाँटीमा चोट लागेको छ । उनी टकराज पक्षका हुन् ।
सुन्दरबजार १० का २९ वर्षे सुदीप अधिकारीको टाउकोमा चोट लागेको छ । ९ नम्बर वडाका ३६ वर्षे खुशीजंग गुरुङको पनि टाउकोमा घाउ देखिन्छ । अर्का ४६ वर्षे किशोर बस्नेतको घुँडामा चोट लागेको छ । उनीहरु सबै भेषबहादुर पक्षका हुन् ।
